آج بارش کہاں کہاں ہوگی؟محکمہ موسمیات کی اہم پیشگوئی
محکمہ موسمیات کے مطابق اسلام آباد میں گزشتہ روز کی نسبت درجہ حرارت بڑھ کر 19 ڈگری سینٹی گریڈ ریکارڈ کیا گیا۔ وفاقی دارالحکومت میں آج موسم گرم اور خشک رہنے کا امکان ہے، جبکہ پنجاب کے بیشتر علاقوں میں بھی موسم خشک رہے گا۔ سندھ اور بلوچستان کے بیشتر اضلاع میں بھی بارش کا امکان کم ہے۔
مری، گلیات اور گردونواح میں بعد از دوپہر مطلع جزوی طور پر ابر آلود رہنے کی توقع ہے، جبکہ خیبر پختونخوا، کشمیر اور گلگت بلتستان کے مختلف علاقوں میں بارش ہوسکتی ہے۔
دوسری جانب باغوں کے شہر لاہور میں فضائی آلودگی تشویشناک سطح پر پہنچ گئی ہے، گزشتہ روز کے مقابلے میں ایئر کوالٹی انڈیکس میں 24 پوائنٹس کا اضافہ ہوا، جس کے بعد مجموعی سطح 221 ریکارڈ کی گئی۔
شہر میں جی ٹی روڈ پر فضائی آلودگی کی شرح 385، برکی روڈ پر 278، ایجرٹن روڈ پر 255، کاہنہ نو میں 237، پنجاب یونیورسٹی میں 226 اور ملتان روڈ پر 208 ریکارڈ کی گئی۔
یہ بھی پڑھیں:پنجاب میں 3 لاکھ خاندانوں کو بلاسود قرضے دینے کا ہدف مقرر
محکمہ موسمیات کے مطابق لاہور میں زیادہ سے زیادہ درجہ حرارت 31 جبکہ کم سے کم 19 ڈگری سینٹی گریڈ رہنے کا امکان ہے۔ شہر میں ہوا کی رفتار 3 کلومیٹر فی گھنٹہ اور نمی کا تناسب 83 فیصد رہنے کی توقع ہے۔ شہریوں کو فضائی آلودگی کے پیش نظر احتیاطی تدابیر اختیار کرنے کا مشورہ دیا جاتا ہے۔
