متعدد علاقوں میں گیس بندش کا اعلان، شیڈول جاری
گیس کی فراہمی متاثر ہونے کے باعث شہریوں کو مشکلات سے بچنے کے لیے پہلے سے متبادل انتظامات کرنے کی ہدایت کی گئی ہے۔
سوئی ناردرن کی جانب سے جاری اعلامیے کے مطابق اسلام آباد میں مین گیس پائپ لائن میں لیکیج کے باعث مرمت کا کام کیا جائے گا، جس کے نتیجے میں متعدد علاقوں میں گیس کی فراہمی عارضی طور پر معطل رہے گی۔
اعلامیے کے مطابق غوری ٹاؤن، فیض آباد بائی پاس روڈ، ہائی اسٹیٹ روڈ، کھنہ پل سے بارہ موڑ تک، سوان گاؤں، گلبرگ ٹاؤن، شکریال، رحمن گارڈن، برما ٹاؤن، گارڈن ٹاؤن اور ملحقہ علاقوں میں پیر 19 اکتوبر کی رات 9 بجے سے منگل 20 اکتوبر کی صبح 6 بجے تک گیس بند رہے گی۔
دوسری جانب اسلام آباد کے سیکٹر جی سیون، بلیو ایریا اور ان کے گردونواح میں بھی گیس کی فراہمی عارضی طور پر معطل کرنے کا اعلان کیا گیا ہے۔ ان علاقوں میں پیر کی رات 10 بجے سے منگل کی صبح 6 بجے تک گیس دستیاب نہیں ہوگی۔
سوئی ناردرن نے متاثرہ علاقوں کے صارفین کو ہدایت کی ہے کہ وہ گیس کی بندش کے دوران پریشانی سے بچنے کے لیے کھانا پکانے سمیت روزمرہ ضروریات کے لیے متبادل انتظامات کرلیں۔
یہ بھی پڑھیں:عالمی منڈی میں خام تیل مہنگا ہوگیا
گیس کمپنی نے مزید کہا ہے کہ بندش کے دوران گیس کے آلات بند رکھے جائیں تاکہ گیس کی فراہمی بحال ہونے پر کسی ممکنہ حادثے سے بچا جا سکے۔ شہریوں کو مرمتی کام کے دوران مقررہ اوقات کو مدنظر رکھتے ہوئے اپنی ضروریات کا انتظام کرنے کی ہدایت کی گئی ہے۔
