اپنی چھت اپنا گھر پروگرام، خاندانوں کو بلاسود قرضے دینے کا ہدف

وزیراعلیٰ پنجاب مریم نواز کے ترجیحی منصوبے اپنی چھت اپنا گھر پروگرام کے تحت بلاسود قرضوں کے حصول کے لیے درخواستوں کی تعداد 15 لاکھ 28 ہزار سے تجاوز کر گئی ہے، جبکہ اب تک 2 لاکھ 17 ہزار سے زائد خاندانوں کو 284 ارب 40 کروڑ روپے سے زائد کے قرضے جاری کیے جا چکے ہیں۔

پروگرام سے متعلق پھاٹا حکام نے وزیر ہاؤسنگ پنجاب بلال یاسین کو بریفنگ دی، جس میں بتایا گیا کہ صوبے میں اس منصوبے کے تحت ایک لاکھ 26 ہزار 239 گھر مکمل ہو چکے ہیں۔

یہ بھی پڑھیں: پاکستانیوں کیلئے پاسپورٹ بنوانا مہنگا ہوگیا، فیس دگنی

بلال یاسین کا کہنا تھا کہ اس پروگرام کا بنیادی مقصد کرائے کے گھروں میں رہنے والے مستحق خاندانوں کو اپنا گھر تعمیر کرنے میں مالی معاونت فراہم کرنا ہے۔ ان کے مطابق 15 لاکھ سے زائد درخواستوں کی وصولی اس منصوبے کی اہمیت کو ظاہر کرتی ہے۔

وزیر ہاؤسنگ پنجاب نے مزید کہا کہ اپنی چھت اپنا گھر پروگرام میں شفافیت اور میرٹ کو یقینی بنایا جا رہا ہے، جبکہ حکومت کا ہدف زیادہ سے زیادہ مستحق خاندانوں کو اپنے گھر کی تعمیر کے لیے بلاسود قرضوں کی سہولت فراہم کرنا ہے۔