اسلام آباد مارچ: آئی جی خیبر پختونخوا نے افسران کو معاونت سے روک دیا
یہ ہدایت اسلام آباد ہائی کورٹ کی جانب سے سرکاری مشینری اور وسائل کو سیاسی احتجاج کیلئے استعمال نہ کرنے کی ہدایات کے بعد سامنے آئی ہے۔
آئی جی خیبر پختونخوا نے پولیس افسران کو ہدایت کی کہ اگر کسی افسر کو اسلام آباد جانے والے مارچ، ریلی یا جلوس کیلئے سہولت فراہم کرنے کی ہدایت دی جائے تو وہ فوری طور پر آئی جی پولیس کو آگاہ کرے، عدالتی احکامات کی خلاف ورزی کرنے والے افسر کے خلاف کارروائی کی جائے گی۔
واضح رہے کہ اسلام آباد ہائی کورٹ نے 14 ستمبر کے فیصلے میں قرار دیا تھا کہ کسی سیاسی جماعت، رہنما یا صوبائی حکومت کو وفاقی دارالحکومت کی سڑکیں اور شاہراہیں بند کرنے کا قانونی اختیار نہیں۔
عدالت نے صوبائی حکومتوں کو یہ بھی ہدایت کی تھی کہ اسلام آباد کی جانب کسی مارچ یا احتجاج کیلئے سرکاری گاڑیاں، مشینری، فنڈز یا دیگر وسائل استعمال نہ کیے جائیں۔
عدالت کے مطابق کسی احتجاج یا مارچ کے باعث شہریوں کی آزادانہ نقل و حرکت، کاروبار، تعلیمی اداروں اور طبی سہولیات تک رسائی متاثر نہیں ہونی چاہیے۔
یہ بھی پڑھیں:پی ٹی آئی کا اسلام آباد لانگ مارچ کا پلان سامنے آگیا
اس سے قبل خیبر پختونخوا کے چیف سیکریٹری نے بھی سرکاری افسران کو اسلام آباد جانے والے مارچ، ریلی یا جلوس میں مدد یا سہولت فراہم نہ کرنے کی ہدایت کی تھی، سرکاری وسائل اور فنڈز کے استعمال سے بھی روک دیا گیا تھا۔
