کاہنہ ٹیوشن سینٹر سانحہ: لواحقین کیلئے 20،20 لاکھ روپے امداد کا اعلان
حکومتی فیصلے کے مطابق ہر جاں بحق بچے کے لواحقین کو 20،20 لاکھ روپے جبکہ زخمی بچوں اور ٹیچر کو 5،5 لاکھ روپے دیے جائیں گے۔
مشیر وزیراعلیٰ پنجاب ذیشان ملک نے بتایا کہ حکومت متاثرہ خاندانوں کے غم میں برابر کی شریک ہے اور جاں بحق بچوں کے والدین کو فوری مالی امداد فراہم کی جائے گی۔ ان کا کہنا تھا کہ زخمی ہونے والے بچوں اور ٹیچر انیلا کے علاج معالجے کیلئے بھی خصوصی اقدامات کیے جا رہے ہیں۔
واضح رہے کہ گزشتہ روز لاہور کے علاقے کاہنہ میں ایک گھر میں قائم ٹیوشن سینٹر کی چھت اچانک گر گئی تھی، جس کے نتیجے میں ملبے تلے دب کر 14 معصوم بچے جاں بحق جبکہ 8 بچے اور ایک خاتون ٹیچر زخمی ہو گئے تھے۔ زخمیوں کو فوری طور پر قریبی اسپتال منتقل کیا گیا، جہاں ان کا علاج جاری ہے۔
دوسری جانب اس افسوسناک واقعے کے بعد ضلعی انتظامیہ اور محکمہ تعلیم نے لاہور بھر میں غیرقانونی اور غیررجسٹرڈ ٹیوشن سینٹرز کیخلاف بڑے پیمانے پر کریک ڈاؤن کا فیصلہ کر لیا ہے۔
ضلعی ایجوکیشن اتھارٹی نے تمام متعلقہ افسران کو ہدایت جاری کی ہے کہ تین روز کے اندر شہر بھر میں قائم غیررجسٹرڈ ٹیوشن سینٹرز کا مکمل ریکارڈ مرتب کیا جائے۔
حکام کے مطابق گھروں میں بغیر اجازت کمرشل بنیادوں پر چلائے جانے والے ٹیوشن سینٹرز کیخلاف سخت کارروائی کی جائے گی۔ خلاف ورزی کرنے والوں پر جرمانے عائد کیے جائیں گے جبکہ غیرقانونی طور پر قائم ٹیوشن سینٹرز کو سیل بھی کیا جائے گا۔
یہ بھی پڑھیں:کاہنہ میں ٹیوشن سنٹر گھر میں کھلا تھا، سکول یا اکیڈمی نہیں تھی: وزیرتعلیم
حکومت کا کہنا ہے کہ مستقبل میں ایسے افسوسناک واقعات سے بچنے کیلئے حفاظتی اقدامات اور قانونی ضوابط پر سختی سے عمل درآمد یقینی بنایا جائے گا۔
