آج بادل کہاں برسیں گے؟ محکمہ موسمیات کی پیشگوئی

لاہور سمیت کئی شہروں میں بادل خوب برسے، جس کے باعث شدید گرمی کی لہر میں نمایاں کمی آئی اور موسم خوشگوار ہو گیا۔ شہریوں نے بارش کا بھرپور لطف اٹھایا جبکہ مختلف علاقوں میں ٹھنڈی ہواؤں نے بھی گرمی کا زور توڑ دیا۔

محکمہ موسمیات کے مطابق خیبرپختونخوا کے بیشتر اضلاع میں آج موسم گرم رہنے کا امکان ہے، تاہم پشاور سمیت صوبے کے میدانی اور بالائی علاقوں میں مطلع جزوی طور پر ابر آلود رہے گا۔

محکمہ موسمیات نے ملاکنڈ اور ہزارہ ڈویژن کے بیشتر علاقوں میں بارش کی پیشگوئی بھی کی ہے، جس سے موسم مزید خوشگوار ہونے کی توقع ہے۔

اعداد و شمار کے مطابق پشاور کا درجہ حرارت 31 ڈگری سینٹی گریڈ جبکہ ہوا میں نمی کا تناسب 58 فیصد ریکارڈ کیا گیا۔ اسی طرح چترال میں 14، دیر میں 18، مالم جبہ میں 21، سیدو شریف میں 24، بنوں میں 31، ڈی آئی خان میں 32 اور ایبٹ آباد میں 24 ڈگری سینٹی گریڈ درجہ حرارت ریکارڈ کیا گیا۔

یہ بھی پڑھیں:ایمبولینس پر اندھا دھند فائرنگ، 4 افراد جاں بحق

ماہرین موسمیات کا کہنا ہے کہ بارش کے باعث کئی علاقوں میں درجہ حرارت میں مزید کمی آ سکتی ہے، تاہم شہریوں کو موسمی تبدیلیوں کے پیش نظر احتیاطی تدابیر اختیار کرنے اور محکمہ موسمیات کی تازہ ترین ہدایات پر عمل کرنے کا مشورہ دیا گیا ہے۔