وفاقی بجٹ پر مریم نواز کی وزیر اعظم شہباز شریف کو مبارکباد
انہوں نے کہا کہ ملک میں معاشی بہتری کے آثار نمایاں ہو رہے ہیں اور اب وقت آ گیا ہے کہ اس کے ثمرات براہِ راست عام شہری تک پہنچائے جائیں۔
وزیراعلیٰ پنجاب نے اپنے بیان میں وفاقی حکومت کی جانب سے پیش کیے گئے بجٹ کو خوش آئند قرار دیتے ہوئے کہا کہ یہ بجٹ مختلف طبقات کو ریلیف فراہم کرنے کے عزم کی عکاسی کرتا ہے۔
ان کا کہنا تھا کہ تنخواہ دار طبقے پر مالی بوجھ کم کرنے، صنعتوں کے فروغ اور زرعی شعبے کی ترقی کے لیے کیے گئے اقدامات ملکی معیشت کو مزید مضبوط بنانے میں اہم کردار ادا کریں گے۔
مریم نواز شریف نے وزیراعظم شہباز شریف اور ان کی ٹیم کو خراج تحسین پیش کرتے ہوئے کہا کہ موجودہ معاشی چیلنجز کے باوجود عوام دوست بجٹ پیش کرنا ایک مثبت پیش رفت ہے، بجٹ میں شامل اصلاحات اور ریلیف اقدامات سے کاروباری سرگرمیوں کو فروغ ملے گا، روزگار کے نئے مواقع پیدا ہوں گے اور عوام کی معاشی مشکلات میں کمی آئے گی۔
وزیراعلیٰ پنجاب نے مزید کہا کہ فلاحی اور ترقیاتی اقدامات پر مشتمل یہ بجٹ معاشرے کے ہر طبقے کو قومی ترقی کے سفر میں شریک کرنے کی صلاحیت رکھتا ہے، حکومت کی کوشش ہے کہ معاشی استحکام کے ساتھ ساتھ عوامی خوشحالی کو بھی یقینی بنایا جائے تاکہ ترقی کے ثمرات ملک کے ہر شہری تک پہنچ سکیں۔
یہ بھی پڑھیں:چھوٹے دکانداروں کیلئے ایک فیصد فکس ٹیکس کی تجویز
انہوں نے اس عزم کا اظہار بھی کیا کہ پنجاب حکومت وفاقی حکومت کے ساتھ مل کر عوامی فلاح اور معاشی بہتری کے لیے اپنی کاوشیں جاری رکھے گی۔
