شوٹنگ کے دوران امیتابھ بچن گر کر زخمی ہوگئے
پروگرام کے آغاز میں امیتابھ بچن نے ناظرین کو اپنی چوٹ سے متعلق آگاہ کرتے ہوئے بتایا کہ گزشتہ روز ریکارڈنگ کے دوران اچانک ان کا پاؤں پھسل گیا، جس کے نتیجے میں وہ گر پڑے۔ اداکار نے اپنے بائیں گھٹنے کی جانب اشارہ کرتے ہوئے بتایا کہ انہیں اسی مقام پر چوٹ لگی ہے۔
امیتابھ بچن کی گفتگو کے بعد پروگرام میں موجود ناظرین بھی ان کی صحت کے حوالے سے فکرمند دکھائی دیے۔ اداکار عام طور پر کون بنے گا کروڑ پتی کے ابتدائی مونولاگ کے دوران کھڑے رہتے ہیں، تاہم گھٹنے کی چوٹ کے باعث اس مرتبہ انہوں نے یہ حصہ بیٹھ کر پیش کیا۔
اداکار کا کہنا تھا کہ زخمی گھٹنے کی وجہ سے زیادہ دیر کھڑے رہنے میں کچھ دشواری محسوس ہو رہی ہے، اسی لیے انہوں نے ابتدائی گفتگو بیٹھ کر کرنے کا فیصلہ کیا۔
تاہم امیتابھ بچن نے واضح کیا کہ ان کی چوٹ زیادہ سنگین نہیں ہے اور وہ شو کی میزبانی جاری رکھیں گے۔ انہوں نے بتایا کہ امیدواروں کے ساتھ پروگرام کے دوران انہیں کھڑا ہونا ہوگا، جس کیلئے وہ تیار ہیں۔
امیتابھ بچن کے اس انکشاف کے بعد سوشل میڈیا پر ان کے مداحوں کی جانب سے ان کی صحت کے حوالے سے تشویش کا اظہار کیا گیا اور ان کیلئے نیک خواہشات کا اظہار کیا جا رہا ہے۔
یہ بھی پڑھیں:بالی ووڈ کے معروف اداکار مشتاق خان انتقال کر گئے
واضح رہے کہ امیتابھ بچن کئی برسوں سے کون بنے گا کروڑ پتی کی میزبانی کر رہے ہیں اور شو کے موجودہ سیزن میں بھی وہ ناظرین اور امیدواروں سے گفتگو کرتے نظر آ رہے ہیں۔
