یوٹیوبر رجب بٹ نے متنازع بیان پر معافی مانگ لی
چند روز قبل رجب بٹ کی زید علی ٹی کے ساتھ ٹک ٹاک لائیو کی ایک ویڈیو سوشل میڈیا پر وائرل ہوئی تھی، جس میں انہوں نے زید علی کے تاثرات پر تبصرہ کرتے ہوئے بچوں کے جنسی استحصال جیسے حساس معاملے کو مذاق کے طور پر استعمال کیا تھا۔
ویڈیو سامنے آنے کے بعد سوشل میڈیا صارفین نے رجب بٹ کو شدید تنقید کا نشانہ بنایا۔
بعد ازاں، رجب بٹ نے انسٹاگرام سٹوری کے ذریعے اپنے بیان پر معذرت کرتے ہوئے کہا کہ ویڈیو میں کہی گئی بات انتہائی نامناسب اور حد سے بڑی ہوئی تھی، ایسا مذاق واقعی کسی صورت قابل قبول نہیں۔
یہ بھی پڑھیں: یوٹیوبر معاز صفدر کو متنازع بیان مہنگا پڑ گیا، مقدمہ درج
انہوں نے کہا کہ اس نوعیت کے مذاق بد قسمتی سے معاشرے، خاص طور پر لڑکوں کی محفلوں میں عام ہے تاہم کسی بات کا عام ہونا اسے درست یا قابل قبول نہیں بنا دیتا۔
رجب بٹ کا کہنا تھا کہ ملک میں بچوں کے جنسی استحصال کا مسئلہ انتہائی سنگین ہے اس لیے انہیں اس معاملے پر زیادہ حساس اور محتاط ہونا چاہیے تھا تاہم یوٹیوبر نے ان تمام افراد سے بھی معافی مانگی جن کے جذبات ان کے الفاظ سے مجروح ہوئے یا جن کے ماضی کے تکلیف دہ تجربات دوبارہ یاد آگئے۔
انہوں نے وضاحت کی کہ وائرل ہونے والی ویڈیو پرانی ہے لیکن ویڈیو کا پرانا ہونا ان کے کہے گئے کہ الفاظ کا جواز نہیں بن سکتا۔
رجب بٹ نے کہا کہ وہ اپنی غلطیوں سے سیکھنے کی کوشش کر رہے ہیں اور آئندہ اپنے الفاظ اور ان کے ممکنہ اثرات کے حوالے سے زیادہ ذمہ داری اور احتیاط کا مظاہرہ کریں گے۔
