ناصر مدنی نے مومنہ اقبال سے معافی مانگ لی
تفصیلات کے مطابق اداکارہ مومنہ اقبال اور مسلم لیگ (ن) کے رکن صوبائی اسمبلی ثاقب چدھڑ کے درمیان سامنے آنے والے تنازع کے بعد ناصر مدنی نے ایک تقریر کے دوران مومنہ اقبال پر سخت تنقید کی تھی۔
انہوں نے اداکارہ کے حوالے سے سنگین الزامات عائد کیے اور تنازع کا ذمہ دار بھی انہیں قرار دیا، جس پر سوشل میڈیا پر بھی شدید بحث چھڑ گئی۔
ناصر مدنی کے بیان کے بعد مومنہ اقبال نے اسے اپنی ساکھ اور عزت کیخلاف قرار دیتے ہوئے قانونی کارروائی کا اعلان کیا۔
بعد ازاں 17 جون کو انہوں نے اپنے وکیل ایڈووکیٹ عدنان احسان خان کے ذریعے ناصر مدنی کو 17 کروڑ روپے ہرجانے کا قانونی نوٹس بھجوایا۔
قانونی نوٹس میں مؤقف اختیار کیا گیا تھا کہ ناصر مدنی کے بیانات اداکارہ کی شہرت، پیشہ ورانہ زندگی اور سماجی وقار کو نقصان پہنچانے کا سبب بنے ہیں، اس لیے ان سے مطالبہ کیا گیا کہ وہ اپنے ریمارکس کی تردید کریں، متعلقہ مواد ہٹائیں اور عوامی سطح پر غیر مشروط معافی مانگیں۔
یہ بھی پڑھیں:معروف گلوکار طارق طافو 58 سال کی عمر میں انتقال کر گئے
ناصر مدنی نے اپنے متنازع بیان پر معذرت کرتے ہوئے معاملہ خوش اسلوبی سے حل کرنے کی کوشش کی ہے، تاہم یہ واضح نہیں کیا گیا کہ قانونی نوٹس واپس لیا جائے گا یا نہیں۔
