سونے کی قیمت میں بڑی کمی، فی تولہ کتنے کا ہوگیا؟
عالمی مارکیٹ میں قیمتیں گرنے کے اثرات مقامی صرافہ بازاروں میں بھی دیکھنے میں آئے ہیں۔
تفصیلات کے مطابق عالمی بلین مارکیٹ میں سونے کی قیمت 65 ڈالر فی اونس کم ہوکر 4066 ڈالر کی سطح پر آگئی، جس کے بعد پاکستان میں بھی سونے کی قیمت میں نمایاں کمی ریکارڈ کی گئی۔
مقامی صرافہ مارکیٹ کے مطابق فی تولہ سونے کی قیمت میں 6500 روپے کی کمی ہوئی، جس کے بعد نئی قیمت 4 لاکھ 29 ہزار 136 روپے ہوگئی۔
اسی طرح 10 گرام سونے کی قیمت بھی 5573 روپے کم ہوکر 3 لاکھ 67 ہزار 914 روپے پر آگئی۔
دوسری جانب سونے کے ساتھ چاندی کی قیمت میں بھی کمی ریکارڈ کی گئی ہے، فی تولہ چاندی 85 روپے سستی ہونے کے بعد 5678 روپے میں فروخت ہو رہی ہے۔
واضح رہے کہ عالمی مارکیٹ میں سونے کی قیمتوں میں اتار چڑھاؤ کا براہ راست اثر پاکستان کی مقامی صرافہ مارکیٹ پر پڑتا ہے۔ ڈالر کی قدر، عالمی معاشی صورتحال اور سرمایہ کاروں کی جانب سے سونے کی خرید و فروخت بھی قیمتوں میں تبدیلی کا سبب بنتی ہے۔
یہ بھی پڑھیں:عالمی منڈی میں تیل مسلسل چوتھے روز سستا
مسلسل دو روز اضافے کے بعد سونے کی قیمت میں حالیہ کمی نے زیورات خریدنے کے خواہشمند افراد کی توجہ ایک بار پھر صرافہ بازاروں کی جانب مبذول کرادی ہے۔
