عالمی منڈی میں خام تیل کی قیمتیں بڑھ گئیں
عالمی مارکیٹ میں برینٹ خام تیل کے سودے 2.51 ڈالر یا 2.85 فیصد اضافے کے بعد 90.61 ڈالر فی بیرل پر پہنچ گئے، جبکہ امریکی ویسٹ ٹیکساس انٹرمیڈیٹ خام تیل کی قیمت میں بھی نمایاں اضافہ دیکھا گیا۔ WTI کی قیمت 2.13 ڈالر یا 2.55 فیصد بڑھ کر 85.53 ڈالر فی بیرل ہوگئی۔
رپورٹ کے مطابق امریکا اور ایران کے درمیان تازہ فوجی کشیدگی کا آغاز اس وقت ہوا جب امریکی فورسز نے اتوار کو آبنائے ہرمز میں واقع ایرانی جزیرے لارک پر موجود دو لانچرز کو نشانہ بنایا۔ اسے جولائی کے اواخر کے بعد ایران کے خلاف امریکا کی پہلی معلوم فوجی کارروائی قرار دیا جا رہا ہے۔
امریکی کارروائی کے ردعمل میں ایران کے پاسدارانِ انقلاب نے اردن میں موجود دو امریکی فضائی اڈوں کو نشانہ بنایا، ایرانی میڈیا نے پاسدارانِ انقلاب کے حوالے سے اس کارروائی کی تصدیق کی۔
مارکیٹ تجزیہ کار ٹونی سائکامور کا کہنا ہے کہ خطے میں ایک بار پھر کشیدگی بڑھتی ہوئی دکھائی دے رہی ہے، تاہم یہ صورتحال کتنے عرصے تک برقرار رہے گی، اس بارے میں فی الحال کچھ کہنا مشکل ہے، کشیدگی چند دنوں سے لے کر چند ہفتوں تک جاری رہ سکتی ہے۔
یہ بھی پڑھیں:اسٹاک مارکیٹ کا نیا سہولت اکاؤنٹ اب صرف ایک دن میں کھلے گا
دوسری جانب تکنیکی تجزیے کے مطابق اگر WTI خام تیل 85.80 سے 85.90 ڈالر فی بیرل کی مزاحمتی سطح عبور کرلیتا ہے تو قیمت پہلے گزشتہ ہفتے کی 87.69 ڈالر کی بلند ترین سطح اور بعد ازاں جولائی کی 93.50 ڈالر فی بیرل کی سطح تک پہنچ سکتی ہے۔
