پٹرول ڈیلرز نے نئی پٹرولیم پالیسی مسترد کردی، ہڑتال کا عندیہ

چیئرمین آل پاکستان پٹرول پمپ اونرز ایسوسی ایشن نعمان علی نے نئی پٹرولیم پالیسی پر ردعمل میں کہا کہ حکومت کی جانب سے مجوزہ پٹرولیم پرائس ڈی ریگولیشن پالیسی مسترد کرتے ہیں ، اگر فیصلہ واپس نہ لیا گیا تو آئندہ ہفتے احتجاج اور ہڑتال پر غور کریں گے۔

ان کا کہنا تھا کہ حکومت اپنی پالیسی پر نظرثانی کرے، مسائل کا بوجھ پٹرول پمپ مالکان پر نہ ڈالا جائے ، او ایم سیز کے ساتھ ریٹ طے کرنے سے قبل تمام اسٹیک ہولڈرز کو اعتماد میں لیا جائے۔

نعمان علی نے کہا کہ ملک بھر کے تقریباً 15 ہزار پٹرول پمپ مالکان شدید تحفظات کا شکار ہیں ، نئی پالیسی سے آئل ٹینکرز، ٹرانسپورٹیشن اور قیمتوں کے تعین کا نظام متاثر ہو گا۔

چیئرمین آل پاکستان پٹرول پمپس اونرز ایسوسی کا مزید کہنا تھا کہ حکومت یکطرفہ فیصلوں کے بجائے پٹرول پمپ مالکان سے مشاورت کرے۔

یہ بھی پڑھیں: حکومت کا پٹرولیم مصنوعات کی قیمتوں میں روزانہ ردوبدل کا فیصلہ

واضح رہے کہ حکومت نے روزانہ کی بنیاد پر پٹرولیم مصنوعات کی قیمتوں میں ردوبدل کرنے کا اعلان کیا ہے۔

وزیر پٹرولیم علی پرویز ملک نے پریس کانفرنس کرتے ہوئے کہا کہ وزیراعظم اور کابینہ نے فیصلہ کیا ہے کہ اوگرا روزانہ کی بنیاد پر قیمتوں کا تعین کرے،اوگرا روزانہ کی بنیاد پر قیمتیں ویب سائٹ پر شائع کرے گی۔