بھارت: پٹرولیم مصنوعات کی قیمتوں میں کمی کا اعلان
میڈیا رپورٹس کے مطابق نائرا انرجی نے اپنے ملک گیر نیٹ ورک پر پٹرول 5 روپے فی لٹر اور ڈیزل 3 روپے فی لٹر سستا کر دیا ہے۔
کمپنی کے مطابق نئی قیمتوں کا اطلاق اس کے 7 ہزار سے زائد فیول اسٹیشنز پر ہو چکا ہے تاہم مختلف ریاستوں میں مقامی ٹیکسز، خصوصاً ویٹ کے باعث پمپ پر قیمتیں مختلف ہو سکتی ہیں۔
رپورٹس کے مطابق مشرق وسطیٰ میں کشیدگی کم ہونے کے بعد عالمی منڈی میں خام تیل کی قیمتوں میں کمی آئی ہے جس کے بعد نائرا انرجی نے صارفین کو ریلیف دینے کے لیے فیول نرخ کم کیے۔
دوسری جانب سرکاری کمپنیوں انڈین آئل کارپوریشن، بھارت پٹرولیم کارپوریشن لمیٹڈ اور ہندوستان پٹرولیم کارپوریشن لمیٹڈ نے پٹرول اور ڈیزل کی قیمتوں میں کوئی تبدیلی نہیں کی، یہ تینوں سرکاری کمپنیاں بھارت کے ایک لاکھ سے زائد فیول اسٹیشنز میں سے 90 فیصد سے زیادہ نیٹ ورک چلاتی ہیں۔
یہ بھی پڑھیں: عالمی منڈی میں خام تیل کی قیمتوں میں اضافہ
میڈیا رپورٹس کے مطابق دہلی میں سرکاری آؤٹ لیٹس پر پٹرول کی قیمت 102.12 روپے فی لٹر اور ڈیزل کی قیمت 95.20 روپے فی لٹر برقرار ہے۔
واضح رہے کہ مارچ میں عالمی سطح پر تیل کی قیمتوں میں اضافے کے دوران نائرا انرجی نے پٹرول 5 روپے اور ڈیزل 3 روپے فی لٹر مہنگا کیا تھا، اب کمپنی نے وہ اضافہ واپس لے لیا ہے، جسے عالمی آئل مارکیٹ میں استحکام کے بعد بھارتی صارفین کے لیے ممکنہ ریلیف کا اشارہ قرار دیا جا رہا ہے۔
