ایران کیخلاف جنگ میں کتنے امریکی فوجی طیاروں کو نقصان پہنچا؟
کانگریشنل ریسرچ سروس کی رپورٹ کے مطابق ایران کے خلاف فوجی کارروائیوں کے دوران امریکی فکسڈ ونگ طیاروں، ہیلی کاپٹرز اور بغیر پائلٹ طیاروں کو نقصان پہنچا یا وہ مکمل طور پر تباہ ہوگئے۔
رپورٹ میں بتایا گیا کہ امریکی فوجی اثاثوں میں سب سے زیادہ نقصان ایم کیو-9 ریپر ڈرونز کو ہوا۔ ایران کے خلاف کارروائیوں کے دوران کم از کم 45 ڈرونز ضائع ہوئے، جس سے امریکی فضائی نگرانی اور حملہ آور صلاحیتوں کو نقصان پہنچا۔
کانگریشنل ریسرچ سروس کے مطابق مارچ میں کویت میں 3 امریکی طیارے اپنے ہی فریق کی فائرنگ کے نتیجے میں تباہ ہوئے، جبکہ اپریل میں ایران کے اوپر ایک ایف-15 ای طیارہ بھی تباہ ہوگیا۔
رپورٹ میں مزید کہا گیا ہے کہ ستمبر میں اردن کے ایک فضائی اڈے پر ایرانی حملے کے نتیجے میں 8 ایف-15 طیاروں کو نقصان پہنچا، تاہم یہ تمام طیارے بعد ازاں دوبارہ سروس میں شامل کر دیے گئے۔
اس کے علاوہ ایک ایف-35 اے لائٹننگ ٹو، اے-10 تھنڈر بولٹ ٹو کے 2 طیارے اور کے سی-135 فضائی ایندھن بھرنے والے 7 طیارے بھی نقصان کا شکار ہوئے۔
یہ بھی پڑھیں:یمن میں حوثیوں کے خلاف فوجی کارروائی کا اعلان
رپورٹ کے مطابق طیاروں کو پہنچنے والے نقصانات کی نوعیت مختلف تھی، تاہم مجموعی اعداد و شمار ایران کے خلاف امریکی فوجی کارروائیوں کے دوران فضائی اثاثوں کو درپیش خطرات کو نمایاں کرتے ہیں۔
