ایران امریکا جنگ خاتمے کے قریب ہے: ٹرمپ
بین الاقوامی میڈیا کے مطابق ڈونلڈ ٹرمپ نے 16 ستمبر کو ایران کے ساتھ جاری جنگ کے حوالے سے امید ظاہر کی کہ یہ تنازع اختتام کے قریب ہے۔
ان کا کہنا تھا کہ ایران مذاکرات کیلئے آمادگی کا مظاہرہ کرسکتا ہے، تاہم اس حوالے سے مزید تفصیلات سامنے نہیں آئیں۔
امریکی میڈیا کی رپورٹس کے مطابق ٹرمپ کی خلیجی تعاون کونسل کے رکن ممالک کے رہنماؤں یا وزرائے خارجہ سے ملاقات آئندہ ہفتے نیویارک میں اقوام متحدہ کی جنرل اسمبلی کے اجلاس کے موقع پر متوقع ہے۔ سعودی عرب، متحدہ عرب امارات، قطر، بحرین، کویت اور عمان کے نمائندوں کی شرکت متوقع بتائی گئی ہے۔
ملاقات میں ایران جنگ کے بعد کی حکمت عملی اور خطے کی صورتحال سے متعلق امریکی تجاویز پر غور کیا جائے گا۔
واضح رہے کہ یہ ملاقات ایسے وقت میں متوقع ہے جب ایران تنازع کئی ماہ سے جاری ہے اور اس کے اثرات خطے کے دیگر ممالک پر بھی پڑ رہے ہیں۔
اقوام متحدہ کی جنرل اسمبلی کا اعلیٰ سطحی ہفتہ 18 سے 28 ستمبر تک نیویارک میں جاری رہے گا، جس میں دنیا بھر کے سربراہان مملکت اور حکومت شرکت کریں گے۔
یہ بھی پڑھیں:مکہ مکرمہ پر حوثی ڈرون حملہ ناکام، ہدف سے پہلے تباہ
تاہم ٹرمپ کے بیان کے باوجود جنگ کے خاتمے کے حوالے سے کوئی حتمی معاہدہ یا باضابطہ جنگ بندی سامنے نہیں آئی، اس لیے آئندہ سفارتی رابطوں کو اہم قرار دیا جا رہا ہے۔
