سوڈان: چھوٹا مسافر طیارہ گر کر تباہ، پائلٹ سمیت تمام افراد ہلاک
غیر ملکی خبر رساں ادارے کی ایک رپورٹ کے مطابق جنوبی سوڈان کی سول ایوی ایشن اتھارٹی کے حکام نے بتایا کہ یہ حادثہ پیر کے روز اس وقت پیش آیا جب سیسنا 208 کاراوان طیارہ یئی سے جوبا انٹرنیشنل ایئرپورٹ کی طرف رواں دواں تھا۔
اتھارٹی کے مطابق حادثے کا شکار ہونے والے طیارے میں 13 مسافر اور ایک پائلٹ سوار تھا، طیارے نے صبح 9 بج کر 15 منٹ پر اڑان بھری اور 9 بج کر 43 منٹ پر اس کا کنٹرول ٹاور سے رابطہ منقطع ہو گیا، جس کے بعد طیارہ تقریباً 20 کلومیٹر جنوب مغرب میں گر کر تباہ ہو گیا۔
رپورٹ کے مطابق حکام نے تصدیق کی ہے کہ طیارے میں سوار پائلٹ سمیت تمام 14 افراد ہلاک ہو گئے، طیارے میں سوار 2 مسافروں کا تعلق کینیا سے تھا جب کہ دیگر تمام مسافر جنوبی سوڈان کے باسی تھے۔
یہ بھی پڑھیں: فوجی طیارہ حادثے کا شکار، 29 افراد ہلاک
سوڈانی ایوی ایشن کی ابتدائی رپورٹ میں کہا گیا ہے کہ طیارہ ممکنہ طور پر خراب موسم اور حدِ نگاہ میں کمی کے باعث حادثے کا شکار ہوا، واقعہ کی اطلاع ملتے ہی ریسکیو ٹیمیں جائے حادثہ پر پہنچ گئی ہیں اور ملبے سے معلومات اکٹھی کرنے کا عمل جاری ہے۔
واضح رہے کہ جنوبی سوڈان میں اکثر و بیشتر فضائی حادثات پیش آتے رہے ہیں، جہاں پرانے طیارے، محدود انفراسٹرکچر اور خراب موسم کو حادثات کی بڑی وجوہات قرار دیا جاتا ہے، ماضی میں بھی سوڈان میں متعدد مہلک فضائی حادثات رپورٹ ہو چکے ہیں جن میں بیسیوں افراد جان کی بازی ہار چکے ہیں۔
