ریلوے حکام کے مطابق گلاسگو کے مرکزی ریلوے اسٹیشن کے قریب یونین اسٹریٹ پر واقع ایک دکان میں اچانک آگ لگ گئی جو دیکھتے ہی دیکھتے قریبی چار منزلہ عمارت تک پھیل گئی۔
آگ کی شدت اس قدر زیادہ تھی کہ عمارت کا ایک حصہ منہدم بھی ہوگیا، جس کے باعث ریسکیو اداروں کو فوری کارروائی کرنا پڑی۔
حکام کا کہنا ہے کہ آتشزدگی کے واقعے کے بعد احتیاطی تدابیر کے طور پر مرکزی ریلوے اسٹیشن کو غیر معینہ مدت کیلئے بند کردیا گیا ہے۔ اس فیصلے کے بعد اتوار کے روز درجنوں ٹرینوں کی آمد و رفت منسوخ کردی گئی جبکہ پیر کی صبح بھی اسٹیشن کو دوبارہ کھولنے کا فیصلہ نہیں کیا گیا۔
یہ بھی پڑھیں:آئل ریفائنریوں پر حملے کیوں کیے؟ امریکا اسرائیل سے ناراض ہوگیا
ریلوے انتظامیہ نے مسافروں کو ہدایت جاری کی ہے کہ وہ سفر سے پہلے صورتحال کی تازہ معلومات حاصل کریں اور ممکنہ طور پر متبادل سفری انتظامات کریں کیونکہ اسٹیشن سے گزرنے والی تمام ٹرین سروسز عارضی طور پر معطل کردی گئی ہیں۔
فائر بریگیڈ اور امدادی ٹیمیں آگ پر قابو پانے کیلئے مسلسل کوششیں کر رہی ہیں جبکہ علاقے کو گھیرے میں لے کر شہریوں کو محفوظ مقام پر منتقل کیا جا رہا ہے، آگ لگنے کی وجوہات جاننے کے لیے تحقیقات بھی شروع کر دی گئی ہیں۔
