سرفراز احمد کے بہنوئی عامر وحید صدیقی انتقال کر گئے
ان کے انتقال کی خبر سامنے آنے کے بعد اہلِ خانہ، دوستوں اور کرکٹ سے وابستہ شخصیات میں گہرے رنج و غم کی لہر دوڑ گئی۔
خاندانی ذرائع کے مطابق عامر وحید صدیقی کا انتقال عمان میں ہوا، جہاں ان کی نمازِ جنازہ ادا کرنے کے بعد انہیں مقامی قبرستان میں سپردِ خاک کر دیا گیا۔ انتقال کی وجوہات کے بارے میں فوری طور پر کوئی تفصیلات سامنے نہیں آئیں، تاہم اہلِ خانہ سوگ میں ڈوبے ہوئے ہیں۔
مرحوم معروف کرکٹ شخصیت اور کراچی ریجن کرکٹ سے وابستہ ضیاء صدیقی کے چھوٹے بھائی تھے، کھیلوں کے حلقوں میں ان کی شائستہ شخصیت اور خاندانی وابستگی کو قدر کی نگاہ سے دیکھا جاتا تھا، جس کے باعث ان کے انتقال کی خبر پر متعدد کرکٹرز، منتظمین اور کھیلوں سے وابستہ شخصیات نے افسوس کا اظہار کیا۔
سرفراز احمد کے قریبی حلقوں کے مطابق خاندان اس وقت شدید صدمے سے دوچار ہے، عزیز و اقارب اور دوست احباب نے مرحوم کے درجات کی بلندی، مغفرت اور لواحقین کیلئے صبرِ جمیل کی دعا کی ہے۔
سوشل میڈیا پر بھی کرکٹ شائقین اور مختلف شخصیات نے تعزیتی پیغامات جاری کرتے ہوئے سرفراز احمد اور ان کے اہلِ خانہ سے ہمدردی کا اظہار کیا۔ مداحوں نے دعا کی کہ اللہ تعالیٰ مرحوم کو اپنی جوارِ رحمت میں اعلیٰ مقام عطا فرمائے اور سوگوار خاندان کو یہ ناقابلِ تلافی نقصان برداشت کرنے کی ہمت دے۔
یہ بھی پڑھیں:قومی کراٹے اسٹار آرزو ٹریفک حادثے میں جاں بحق
عامر وحید صدیقی کے انتقال پر کرکٹ برادری سمیت مختلف سماجی حلقوں کی جانب سے اظہارِ افسوس کا سلسلہ جاری ہے، جبکہ مرحوم کے ایصالِ ثواب کیلئے خصوصی دعاؤں کا اہتمام بھی کیا جا رہا ہے۔
