ریسٹورینٹس میں ڈیجیٹل ادائیگیوں پر شہریوں کو انعام دینے کا اعلان
پنجاب ریونیو اتھارٹی کے ترجمان کے مطابق نئی اسکیم کے تحت ہوٹلز اور ریسٹورنٹس میں بل کی ادائیگی ڈیجیٹل طریقے سے کرنے والے صارفین کو انعامات دیے جائیں گے۔
اس مقصد کیلئے کیو آر کوڈ کے ذریعے ادائیگی کی سہولت فراہم کی جائے گی تاکہ شہری نقد رقم کے بجائے جدید ڈیجیٹل نظام سے فائدہ اٹھا سکیں۔
ترجمان کا کہنا ہے کہ اس اقدام کا بنیادی مقصد کاروباری لین دین میں شفافیت کو فروغ دینا اور ٹیکس نظام کو مزید مؤثر بنانا ہے۔ ڈیجیٹل ادائیگیوں کے بڑھتے ہوئے رجحان سے نہ صرف مالی معاملات کا ریکارڈ محفوظ رکھنے میں مدد ملے گی بلکہ ٹیکس وصولیوں میں بھی بہتری آنے کی توقع ہے۔
پنجاب ریونیو اتھارٹی نے واضح کیا ہے کہ ایسے ہوٹلز اور ریسٹورنٹس جو صارفین کو کیو آر کوڈ کے ذریعے ادائیگی کی سہولت فراہم کرنے سے انکار کریں گے، ان کے خلاف سخت قانونی کارروائی کی جائے گی۔
ترجمان کے مطابق ڈیجیٹل ادائیگیوں کے فروغ سے عوام کا ٹیکس نظام پر اعتماد بڑھے گا اور کاروباری سرگرمیوں میں شفافیت یقینی بنانے میں مدد ملے گی۔
یہ بھی پڑھیں:پنجاب میں نمبر پلیٹس چھپانے والوں کیلئے بُری خبر
اس انعامی اسکیم کے ذریعے شہریوں کو ڈیجیٹل ادائیگیوں کی طرف راغب کرنے کے ساتھ ساتھ ہوٹل اور ریسٹورنٹ سیکٹر کو بھی جدید مالیاتی نظام سے منسلک کرنے کی کوشش کی جارہی ہے۔
