پیدائش، وفات اور شادی کے سرٹیفکیٹس بنوانے کا نیا نظام متعارف
نئے نظام کے تحت شہریوں کی شناخت نادرا کے ڈیٹا بیس سے بائیومیٹرک طریقے سے تصدیق کی جائے گی، اس اقدام کا مقصد جعلی اندراجات اور بوگس سرٹیفکیٹس کی روک تھام کرنا ہے۔
تفصیلات کے مطابق محکمہ بلدیات پنجاب اور نیشنل ڈیٹا بیس اینڈ رجسٹریشن اتھارٹی (نادرا) کے اشتراک سے سی آر ایم ایس بائیومیٹرک نظام شروع کیا گیا ہے۔ شیخوپورہ میں صوبائی وزیر بلدیات ذیشان رفیق نے یونین کونسلز میں اس نظام کا باضابطہ افتتاح کیا۔
نئے طریقہ کار کے تحت پیدائش، وفات اور شادی کے سرٹیفکیٹس جاری کرنے کیلئے بائیومیٹرک تصدیق لازمی قرار دی گئی ہے۔ اس نظام کے ذریعے متعلقہ افراد کی شناخت کی جانچ پڑتال کی جائے گی تاکہ غلط معلومات کی بنیاد پر اندراجات اور غیر قانونی دستاویزات کے اجرا کو روکا جاسکے۔
افتتاحی تقریب سے خطاب کرتے ہوئے صوبائی وزیر بلدیات ذیشان رفیق نے کہا کہ بائیومیٹرک نظام کے نفاذ سے سرکاری ریکارڈ کی درستگی بہتر بنانے اور مستند دستاویزات کے اجرا کو یقینی بنانے میں مدد ملے گی۔
انہوں نے کہا کہ شہریوں کو سفارش اور رشوت کے بغیر بروقت بلدیاتی خدمات فراہم کرنا حکومت کی ترجیحات میں شامل ہے۔ نئے نظام سے سرٹیفکیٹس کے اجرا کے عمل میں شفافیت آئے گی اور غیر قانونی اندراجات کی حوصلہ شکنی ہوگی۔
یہ بھی پڑھیں:بجلی 2 روپے 56 پیسے فی یونٹ مہنگی ہونے کا امکان
صوبائی وزیر کے مطابق ڈیجیٹل پنجاب وژن کے تحت اس نظام کو مرحلہ وار صوبے بھر کی تمام یونین کونسلز تک توسیع دی جائے گی، تاکہ شہریوں کو جدید اور آسان بلدیاتی سہولیات فراہم کی جاسکیں۔
نئے نظام کے ذریعے پنجاب میں پیدائش، وفات اور شادی کے اندراجات کو مزید محفوظ اور قابل اعتماد بنانے کی کوشش کی جا رہی ہے۔
