ملک کے مختلف حصوں میں مزید بارشوں کی پیشگوئی
تفصیلات کے مطابق لاہور کے مختلف علاقوں گڑھی شاہو، دھرم پورہ، مغلپورہ، ہربنس پورہ، لال پل، فتح گڑھ، مسلم ٹاؤن، اچھرہ، جین مندر، چوبرجی، ملتان روڈ، ماڈل ٹاؤن، گرین ٹاؤن، کوٹ لکھپت اور نشتر سمیت دیگر علاقوں میں کہیں ہلکی اور کہیں تیز بارش ریکارڈ کی گئی۔
بارش کے بعد شہر کا موسم خوشگوار ہوگیا، شہریوں نے بھی بارش سے لطف اٹھایا۔ محکمہ موسمیات کے مطابق لاہور کا مطلع جزوی ابر آلود رہنے کا امکان ہے، جبکہ شہر میں مزید بارش بھی متوقع ہے۔
محکمہ موسمیات کے مطابق لاہور میں زیادہ سے زیادہ درجہ حرارت 31 جبکہ کم سے کم 22 ڈگری سینٹی گریڈ رہنے کا امکان ہے۔ شہر میں ہوائیں 10 کلومیٹر فی گھنٹہ کی رفتار سے چل سکتی ہیں جبکہ ہوا میں نمی کا تناسب 92 فیصد رہنے کی توقع ہے۔
دوسری جانب محکمہ موسمیات نے اسلام آباد، کشمیر، گلگت بلتستان، خیبرپختونخوا اور پنجاب کے مختلف علاقوں میں بھی بارش کی پیشگوئی کی ہے۔ اسلام آباد میں بعض مقامات پر گرج چمک، تیز ہواؤں اور آندھی کے ساتھ بارش متوقع ہے۔
محکمہ موسمیات کا کہنا ہے کہ بالائی علاقوں میں بارش کا سلسلہ 18 ستمبر تک جاری رہ سکتا ہے۔ بارشوں کے باعث ندی نالوں میں طغیانی کا خدشہ بھی ظاہر کیا گیا ہے۔
یہ بھی پڑھیں:سانحہ پمز میں واحد بچ جانے والی بچی بھی جان کی بازی ہار گئی
شہریوں کو ہدایت کی گئی ہے کہ بارش کے دوران ندی نالوں، انڈر پاسز اور نشیبی راستوں سے گزرنے میں احتیاط کریں، متعلقہ اداروں کو بھی ممکنہ صورتحال کے پیش نظر الرٹ رہنے کی ہدایت کی گئی ہے۔
