فیلڈ مارشل سید عاصم منیر اہم دورے پر ایران پہنچ گئے
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر کے ہمراہ وفاقی وزیر داخلہ محسن نقوی بھی ایران کے دورے پر روانہ ہوئے ہیں۔
آئی ایس پی آر کے مطابق دورے کا مقصد خطے میں امن و استحکام کے لیے پاکستان کی سفارتی اور سیاسی کوششوں کو آگے بڑھانا ہے۔ فیلڈ مارشل سید عاصم منیر اپنے دورہ ایران کے دوران مشرقِ وسطیٰ میں جاری تنازع اور خطے کی مجموعی صورتحال پر اہم ملاقاتیں کریں گے۔
ترجمان کے مطابق فیلڈ مارشل اپنے دورے کے دوران تنازع کے پرامن حل کے لیے جاری کوششوں کے فروغ اور علاقائی امن و استحکام کے حوالے سے تبادلہ خیال کریں گے۔
پاکستان کی جانب سے خطے میں کشیدگی کم کرنے اور مذاکرات کے ذریعے مسائل کے حل پر زور دیا جاتا رہا ہے۔ حالیہ علاقائی صورتحال کے تناظر میں فیلڈ مارشل سید عاصم منیر کا دورہ ایران اہم پیش رفت قرار دیا جارہا ہے۔
دورے کے دوران دوطرفہ امور کے ساتھ ساتھ مشرقِ وسطیٰ کی صورتحال، علاقائی سلامتی اور امن کے امکانات پر بھی گفتگو متوقع ہے۔
حکام کے مطابق پاکستان خطے میں پائیدار امن کے قیام اور کشیدگی کے خاتمے کے لیے تمام متعلقہ فریقین کے ساتھ رابطے اور سفارتی کوششوں کو جاری رکھے گا۔
یہ بھی پڑھیں:پنشنرز کو اب پروف آف لائف کیلئے بینک جانے کی ضرورت نہیں
فیلڈ مارشل سید عاصم منیر اور وزیر داخلہ محسن نقوی کا یہ دورہ ایسے وقت میں ہورہا ہے جب مشرقِ وسطیٰ میں جاری تنازع کے باعث خطے میں کشیدگی میں اضافہ ہوا ہے اور عالمی سطح پر بھی صورتحال پر گہری نظر رکھی جارہی ہے۔
