مومنہ اقبال کو قتل کی دھمکیاں، اداکارہ کا کارروائی کا مطالبہ
اداکارہ مومنہ اقبال نے فوٹو اینڈ ویڈیو شیئرنگ ایپ انسٹاگرام پر ایک طویل پوسٹ میں قتل کی دھمکیوں کا انکشاف کرتے ہوئے اعلیٰ حکام سے مطلوبہ شخص کے خلاف کارروائی کا مطالبہ کر دیا۔
مذکورہ پوسٹ میں مومنہ اقبال نے بتایا کہ انہیں طویل عرصے سے ایک بااثر شخصیت کی جانب سے ہراساں کیا جارہا ہے اور ان سمیت اہل خانہ کو مسلسل دھمکیاں دی جارہی ہیں۔
اداکارہ کا کہنا تھا کہ این سی سی آئی اے، ایف آئی اے اور پنجاب پولیس کو متعدد بار رپورٹ کیا لیکن اس کے باوجود ملوث فرد کے سیاسی اثر و رسوخ کے باعث کوئی مناسب کارروائی عمل میں نہیں لائی گئی الٹا حوصلہ شکنی کی گئی۔
مومنہ اقبال نے لکھا کہ مجھے اور میرے خاندان کو شدید خطرات لاحق ہیں، میری متعلقہ حکام سے درخواست ہے کہ فوری طور پر غیرجانبدارانہ تحقیقات کی جائیں اور میرے خاندان کو تحفظ فراہم کیا جائے۔
اداکارہ نے اعلیٰ حکام سے درخواست کی کہ اس معاملے میں فوری ایکشن لیا جائے اور ان کی مدد کی جائے۔
یہ بھی پڑھیں: اداکارہ نمرہ خان دوسری بار رشتہ ازدواج میں منسلک
مومنہ اقبال نے مزید کہا کہ مجھے یقین ہے کہ متعلقہ ادارے کسی بھی شخص کے خلاف غیر جانبدارانہ اور قانونی کارروائی کریں گے جو اختیارات کے ناجائز استعمال یا انصاف کی راہ میں رکاوٹ میں ملوث پایا گیا۔
سوشل میڈیا صارفین کی جانب سے اداکارہ کی شکایت پر فوری کارروائی کا مطالبہ کیا جارہا ہے۔
