فلم کی ریلیز کے ساتھ ہی شائقین میں زبردست جوش و خروش دیکھنے میں آ رہا ہے، جبکہ ٹریلر نے پہلے ہی عالمی سطح پر بڑی توجہ حاصل کر لی تھی۔

یہ فلم معروف ہدایت کار انٹوان فوکا کی ہدایت کاری میں تیار کی گئی ہے جبکہ اس کی پروڈکشن گراہم کنگ نے کی ہے۔ فلم میں مائیکل جیکسن کا کردار ان کے حقیقی بھتیجے جعفر جیکسن نے ادا کیا ہے، جو اس پروجیکٹ کے ذریعے اپنے اداکاری کے کیریئر کا آغاز کر رہے ہیں۔

فلم میں جولینوالڈو سمیت مختلف اداکار مائیکل کے بچپن کے کرداروں میں نظر آتے ہیں، جبکہ مرکزی کاسٹ میں کولمین ڈومنگو اور مائلس ٹیلر جیسے بڑے نام بھی شامل ہیں۔

فلم کی کہانی مائیکل جیکسن کی ابتدائی زندگی سے شروع ہو کر جیکسن 5 کے دور اور پھر ان کے عالمی سپر اسٹار بننے کے سفر کو دکھاتی ہے۔ اس میں ان کے میوزک کیریئر، خاندانی تعلقات اور شہرت کے دباؤ جیسے پہلوؤں کو نمایاں کیا گیا ہے۔

کہانی کا فوکس خاص طور پر 1980 کی دہائی کے مشہور Bad Tour تک رکھا گیا ہے، جبکہ بعد کی زندگی کو نسبتاً کم دکھایا گیا ہے۔

یہ بھی پڑھیں:معروف بھارتی اداکارہ دل کا دورہ پڑنے سے انتقال کر گئیں

دلچسپ بات یہ ہے کہ فلم کی تیاری کے دوران اسکرپٹ میں متعدد تبدیلیاں کی گئیں اور بعد میں ری شوٹس بھی کیے گئے، جس کے باعث کچھ حصوں کو محدود کر دیا گیا۔ اس کے باوجود ناقدین کے مطابق فلم بصری طور پر شاندار، موسیقی سے بھرپور اور ایک مضبوط بایوپک پروجیکٹ ثابت ہو سکتی ہے۔