آئی ایم ایف کا دباؤ،عوام سے پیٹرولیم لیوی کی وصولی میں اضافہ

میڈیا رپورٹس کے مطابق پیٹرولیم لیوی کی وصولی حکومتی ہدف اور آئی ایم ایف کے تخمینے سے بھی زیادہ رہی، مالی سال 26-2025ء میں لیوی کی وصولی میں347 ارب 24 کروڑ روپے کا اضافہ ہوا، کلائمٹ سپورٹ لیوی کی مد میں 50 ارب 16 کروڑ روپے الگ وصول کیے جا رہے ہیں۔

مالی سال26-2025ء کے لیے آئی ایم ایف نے پیٹرولیم لیوی وصولی کا تخمینہ 1546 ارب روپے لگایا تھا جبکہ پیٹرولیم لیوی کی وصولی کا حکومتی ہدف 1468 ارب روپے مقرر تھا۔

یہ بھی پڑھیں: حکومت کی جانب سے پیٹرولیم مصنوعات کی قیمتوں میں اضافہ

اس وقت پیٹرول پر 80 روپے فی لیٹر پیٹرولیم لیوی وصول کی جا رہی ہے جبکہ ہائی اسپیڈ ڈیزل پر 77 روپے 28 پیسے فی لیٹر کے حساب سے لیوی عائد ہے۔

واضح رہے کہ مالی سال 25-2024ء میں پیٹرولیم لیوی کی وصولی 1220 ارب 21 کروڑ روپے تھی جبکہ مالی سال 24-2023ء میں پیٹرولیم لیوی کی مد میں وصولی 1 ہزار 19 ارب روپے تھی اور مالی سال 23-2022ء میں پیٹرولیم لیوی کی مد میں وصولی 580 ارب روپے تھی۔