ابتدائی اوقات میں نمایاں گراوٹ کے باعث سو پوائنٹس اشاریہ میں 3240 پوائنٹس کی بڑی کمی ریکارڈ کی گئی، جس کے بعد اشاریہ 151051 کی سطح تک آ گیا۔
معاشی ماہرین کے مطابق اس اچانک مندی کی بڑی وجہ عالمی حالات، خصوصاً مشرقِ وسطیٰ میں بڑھتی ہوئی کشیدگی ہے، جس کے اثرات نہ صرف پاکستان بلکہ دنیا بھر کی مالیاتی منڈیوں پر مرتب ہو رہے ہیں۔ سرمایہ کار غیر یقینی صورتحال کے باعث محتاط رویہ اختیار کر رہے ہیں، جس کے نتیجے میں فروخت کا دباؤ بڑھ گیا ہے۔
عالمی سطح پر بھی حصص بازار دباؤ کا شکار نظر آئے، جنوبی کوریا کے مرکزی اشاریہ میں تقریباً تین فیصد کمی ریکارڈ کی گئی، جبکہ جاپان کے معروف اشاریہ میں بھی اسی نوعیت کی مندی دیکھی گئی۔
یہ بھی پڑھیں:دو سو روپے کے انعامی بانڈ کی قرعہ اندازی
تائیوان کی مارکیٹ میں بھی گراوٹ رہی، جبکہ چین کے شنگھائی اشاریہ میں ایک فیصد کمی سامنے آئی، اسی طرح ہانگ کانگ کے اہم اشاریہ میں بھی تقریباً دو فیصد کمی ریکارڈ کی گئی۔
معاشی ماہرین کا کہنا ہے کہ اگر عالمی کشیدگی میں کمی نہ آئی تو اس کے اثرات مزید گہرے ہو سکتے ہیں اور سرمایہ کاروں کا اعتماد متاثر رہ سکتا ہے۔ انہوں نے حکومت کو مشورہ دیا ہے کہ معاشی استحکام کے لیے فوری اقدامات کیے جائیں تاکہ حصص بازار میں اعتماد بحال کیا جا سکے۔
