آل پاکستان جیمز اینڈ جیولرز ایسوسی ایشن کے مطابق ملکی صرافہ مارکیٹوں میں آج 24 قیراط کے حامل فی تولہ سونے کی قیمت میں ایک ہزار 100روپے کی کمی آگئی جس کے بعد ملکی صرافہ بازاروں میں اونس سونے کا بھاؤ 3 لاکھ 88 ہزار 600 روپے سے کم ہو کر 3 لاکھ 87 ہزار 500 پر آگیا۔

جیولرز ایسوسی ایشن کی جانب سے بتایا گیا کہ ملکی صرافہ مارکیٹوں میں 24 قیراط کے حامل 10 گرام سونے کی قیمت میں بھی کمی دیکھنے میں آئی، پاکستان میں 10 گرام سونے کی قیمت943 روپے کی کمی سے 3 لاکھ 33 ہزار 161 روپے سے کم ہو کر 3 لاکھ 32 ہزار 218 روپے ہو گئی۔

دوسری جانب بین الاقوامی صرافہ مارکیٹوں میں بھی سونے کے نرخوں میں 11 ڈالر فی اونس کی کمی ہوئی جس کے بعد عالمی صرافہ بازاروں میں فی اونس سونا 3 ہزار 657 ڈالر کا ہو گیا۔

یہ بھی پڑھیں: تاریخی بلندیوں کو چھونے کے بعد سونا ہزاروں روپے سستا

ادھر ملکی صرافہ بازاروں میں چاندی کے بھاؤ میں آج اضافہ دیکھنے میں آیا، ملکی صرافہ مارکیٹوں میں فی تولہ چاندی 29 روپے کے اضافے کے بعد 4 ہزار 447 روپے کی ہو گئی جبکہ 10 گرام چاندی کی قیمت 93 روپے کے اضافے کے بعد 3 ہزار 812 روپے پر آگئی۔

عالمی صرافہ مارکیٹ میں بھی چاندی کی قیمت میں 0.29 ڈالر کا اضافہ ریکارڈ کیا گیا، جس کے بعد عالمی صرافہ مارکیٹوں میں فی اونس چاندی کی قیمت 42.20 ڈالر فی اونس ہو گئی۔

یاد رہے کہ گزشتہ روز ملکی صرافہ بازاروں میں سونے کی قیمتوں میں کوئی ردوبدل نہیں ہوا تھا اور 24 قیراط کے حامل فی تولہ سونے کی قیمت 3 لاکھ 88 ہزار 600 روپے پر مستحکم رہی تھی۔