ترجمان ایرانی فوج کے مطابق اسرائیل کے بن گوریان ایئرپورٹ پر ڈرون حملہ کیا گیا، حملے میں اسرائیلی ایئرفورس کے ری فیولنگ طیاروں کو نشانہ بنایا گیا، مقبوضہ بیت المقدس اورتل ابیب میں اسرائیلی تنصیبات کو نشانہ بنایا گیا ہے۔

دوسری جانب بحرینی وزارت دفاع کی جانب سے جاری ایک بیان میں بتایا گیا ہے کہ ایران سے آنے والے میزائلز اور ڈرونز کو انٹرسپٹ کر رہے ہیں، 28 فروری سے اب تک 141 میزائلز اور 242 ڈرونز کا سامنا کیا۔

ادھر اسرائیلی میڈیا نے دعویٰ کیا ہے کہ امریکا کے 3 بحری بیڑے سان ڈی ایگو سے روانہ ہو گئے، یو ایس ایس پورٹ لینڈ، یو ایس ایس کامسٹاک اور یو ایس ایس باکسر کی منزل مشرقِ وسطیٰ بتائی جا رہی ہے۔

یہ بھی پڑھیں: پاسداران انقلاب کا امریکی ایف 35 کو نشانہ بنانے کا دعویٰ

ریپڈ رسپانس فورس کی ممکنہ تعیناتی کے باعث ایران پر زمینی حملے سے متعلق قیاس آرائیاں بڑھ گئی ہیں۔

امریکی و اسرائیلی اقدامات پر ردعمل دیتے ہوئے ایران کے اعلیٰ فوجی ترجمان جنرل ابوالفضل شکارچی نے خبردار کیا ہے کہ اسرائیلی اور امریکی حکام اب دنیا بھر میں کہیں بھی محفوظ نہیں رہیں گے۔

ایرانی سرکاری ٹی وی پر جاری ایک بیان میں جنرل ابوالفضل شکارچی نے کہا کہ اب ہمارے پاس موجود معلومات کی بنیاد پر دنیا میں کہیں بھی پارکس، تفریحی مقامات اور سیاحتی جگہیں آپ کے لیے محفوظ نہیں رہیں گی ۔

انہوں نے مزید کہا کہ ایران کے دشمنوں کو اب عالمی سطح پر عدم تحفظ کا سامنا کرنا پڑے گا۔