ہلاکت خیز واقعے کے بعد ایران بھر میں تین روزہ قومی سوگ کا اعلان کر دیا گیا ہے۔

ایرانی ہلال احمر کے سربراہ کے مطابق 20 زخمیوں کی حالت تشویشناک ہے، انہیں انتہائی نگہداشت کے یونٹ (آئی سی یو) میں منتقل کیا گیا ہے۔ حکام نے خدشہ ظاہر کیا ہے کہ ہلاکتوں میں مزید اضافہ ہو سکتا ہے۔

دھماکے کے بعد بندرگاہ کے متعدد کنٹینرز میں دوبارہ آگ بھڑک اٹھی، جس پر قابو پانے کیلئے ریسکیو ٹیمیں مسلسل کارروائیوں میں مصروف ہیں۔

ایرانی میڈیا کے مطابق ابتدائی تحقیقات سے پتا چلا ہے کہ دھماکہ سینا کنٹینر یارڈ میں خطرناک مواد کے ذخیرے کی وجہ سے ہوا، تاہم واقعے کی مکمل وجوہات جاننے کیلئے تحقیقات جاری ہیں۔

ایران کے صدر مسعود پزیشکیان نے متاثرہ علاقے کا دورہ کیا، زخمیوں کی عیادت کی اور متاثرین کیلئے ہر ممکن امداد فراہم کرنے کا اعلان کیا۔ اس دلخراش سانحے پر پوری قوم غم میں ڈوبی ہوئی ہے۔

دوسری جانب روس نے ایران کو امدادی کارروائیوں اور آگ بجھانے میں مدد کی پیشکش کی ہے، جس پر دونوں ممالک کے درمیان رابطہ جاری ہے۔