تفصیلات کے مطابق وزارت انسانی وسائل و امارات کاری (MOHRE) نے ورک پرمٹ کے حصول کا طریقہ کار نہایت آسان اور شفاف بنا دیا ہے۔ یہ نیا نظام بیرون ملک موجود ہنر مند اور غیر ہنر مند دونوں اقسام کے کارکنان کیلئے لاگو ہوگا، تاہم درخواست کا آغاز صرف آجر (employer) ہی کر سکتا ہے۔

وزارت کے مطابق ورک پرمٹ حاصل کرنے کیلئے چار آسان سے مراحل پر عمل کرنا ہوگا۔ سب سے پہلے آجر کو UAE Pass یا ڈیجیٹل آئی ڈی کے ذریعے وزارت کی ویب سائٹ یا ایپ پر لاگ ان کر کے درخواست جمع کرانی ہوگی۔ درخواست جمع کرانے کے بعد، اگر تمام مطلوبہ دستاویزات مکمل ہوں تو منظوری الیکٹرانک طریقے سے جاری کر دی جائے گی، بصورت دیگر مزید دستاویزات کی طلب کی جائے گی۔

منظوری کے بعد آجر کو حکومتی فیس، انشورنس یا بینک گارنٹی جمع کرانی ہوگی اور ملازمت کی آفر لیٹر منسلک کرنا لازمی ہوگا۔ ہنر مند افراد کی تعلیمی اسناد کی تصدیق وزارت تعلیم کے ذریعے ہوگی، جو تقریباً 2 ہفتوں میں مکمل ہو جائے گی۔ درکار دستاویزات میں پاسپورٹ کی کاپی، رنگین تصویر اور تصدیق شدہ تعلیمی اسناد شامل ہیں۔

وزارت کا کہنا ہے کہ صرف وہ افراد ہنر مند کے زمرے میں آئیں گے جن کی تنخواہ 4000 درہم یا اس سے زائد ہو۔ ڈاکٹروں، اساتذہ، وکلاء اور کوچز جیسے مخصوص شعبوں کیلئے متعلقہ اماراتی اداروں سے پیشہ ورانہ لائسنس حاصل کرنا ضروری ہوگا۔

ذہن نشین رہے کہ پاکستان، افغانستان، ایران اور عراق کے درخواست دہندگان کو دونوں طرف کے قومی شناختی کارڈ کی واضح تصاویر بھی جمع کرانا ہوں گی۔ ادارے کے پاس درست تجارتی لائسنس، خلاف ورزیوں سے پاک ریکارڈ، الیکٹرانک کوٹہ اور دستخط کا قانونی اختیار ہونا چاہیے۔

مزید یہ کہ کارکن کی عمر کم از کم 18 سال ہو اور اس کے پاس پہلے سے کوئی فعال ورک پرمٹ موجود نہ ہو۔ ورک پرمٹ جاری ہونے کے 6 ماہ کے اندر تبدیلی کی اجازت ہوگی، بشرطیکہ قومیت میں تبدیلی ہو لیکن پیشہ اور جنس وہی رہے۔