غیر ملکی میڈیا رپورٹس کے مطابق یکم اپریل سے 6 اپریل تک آئس لینڈ کے جنوب مغربی علاقے میں زلزلے کے سیکڑوں جھٹکے محسوس کئے گئے، جن کی شدت ریکٹر اسکیل پر 3 سے 4 تک ریکارڈ کی گئی جبکہ ان کی گہرائی 4 سے 6 کلو میٹر تک تھی۔

رپورٹ کے مطابق آئس لینڈ کے دارالحکومت سمیت مختلف علاقوں میں زلزلے کے سیکڑوں جھٹکے محسوس کئے گئے، صرف 24 گھنٹوں میں 550 زلزلے کے جھٹکے محسوس کئے گئے ماہرین کا کہنا ہے کہ زلزلے کے مزید جھٹکے بھی محسوس کئے گئے جاسکے ہیں، جن کی شدت 3 سے 4 کے درمیان ہوگی۔

واضح رہے کہ زلزلے قدرتی آفت ہیں جس کے باعث دنیا بھر میں اب تک لاکھوں افراد لقمہ اجل بن چکے ہیں اور کئی قومیں تباہ ہو چکی ہیں۔ ماہرین کے مطابق زمین کی سطح 3 بڑی پلیٹوں سے بنی ہوتی ہے۔ پہلی تہہ یوریشین، دوسری بھارتی اور تیسری کا نام اریبین ہے۔

زیر زمین حرارت جمع ہوتی رہتی ہے تو یہ پلیٹس ایک جگہ سے دوسری جگہ سرکتی ہیں۔ زمین ہلنا شروع ہو جاتی ہے اور یہی کیفیت زلزلہ کہلاتی ہے۔ زلزلے کی لہریں دائرے کی شکل میں چاروں طرف یلغار کرتی ہیں اور خوف و ہراس پھیل جاتا ہے۔ زلزلوں کا آنا یا آتش فشاں کا پھٹنا، ان علاقوں ميں بہت ہوتا ہے جو ان پلیٹوں کے سنگم پر واقع ہوتے ہیں۔

ماہرین کا مزید کہنا ہے کہ جن علاقوں میں ایک مرتبہ بڑا زلزلہ آ جائے تو وہاں دوبارہ بھی بڑا زلزلہ آنے کا قوی امکان ہوتا ہے۔ پاکستان کا دو تہائی علاقہ فالٹ لائنز پر ہے جس کے باعث ان علاقوں میں کسی بھی وقت زلزلہ آسکتا ہے۔

کراچی سے اسلام آباد، کوئٹہ سے پشاور، مکران سے ایبٹ آباد اور گلگت سے چترال وغیرہ، یہ تمام شہر شروع سے ہیزلزلوں کی زد میں ہیں، جن میں کشمیر اور گلگت بلتستان کے علاقے زیادہ حساس شمار ہوتے ہیں۔